Compartir

Púrhepecha

Imanka jimpo janhaskani jaka

INALI, janhaskapasïnti mámaru jásï k’uiripuni ka mámaru jásï wantakuechani ts’ánka yámentu  Méxiku jaka, májkuksï úntasïnti k’uiripuni, kurhajchaasïnti ka marhuatasïnti  yámentu jásï wantakua k’uiripuecheri, imani jimpo ánchekuarhita imankaksï eratsetaraapka tánimu orden gobiernuechani parakaksï pétaapirinka ánchekuarhita jimanka jukarapirinka wantakua indigeneeri ampe ka jimankajtu k’uiripu indígenani sésï marhuakupirinka,  janhanharhipanhani táchani járhati wantakuechani, ístu paraka yápuru ísï k’uiripu úrawaka imeeri wantakua, éska wantantskuarhikuecharhu, ístu jimanka tumineri ampe wantanhani jarhaska, jimanka ánchekuarhinhani jawaka, jimanka politikeeri ampe wantanhani jarhaska, jimanka mimixekueri ampe wantanhani jarhaska ka jimanka tata diosïri ampejtu wantanhani jarhaska, ka jimamentu jimanka k’uiripu indígena niarajka ampe arhijtsïkpeni; yámentu ima ampe, kánekua marhuasïnti, jimpokaksï ísï mínarikuasïnka máteru jarhati k’uiripuechani ka ístu máteru jásï wantakuechani, íni jásï ampe májku úkuarhipasïnti indígenechani jinkuni ka k’umanchikuechani jinkuni ts’anka gobiernuerika.

Imanki úni jaka ampe

Mítekuarhisti éska INALI k’erati ampe ánchekuarhita úaxaka: jukaparharatantasti eratsekuani imanka wantaakuecha indigenecherika, wantakuechani imanka yáasï marhuatanhajka ámbitu publikurhu, socialirhu ka desarrollo de pueblo indigeneecharhu, ístu p’ijpantaasti ka winaperantaasti wantakuechani ts’anka k’amakurhini jápkia jimpoka niaraska janhanharhitpeni, xarhataani ka jukaparharataani jimanka estadu  ka yámentu k’uiripu ménki mítetini jawaka. Kánekua marhuasïnti jananharhikua imanka wantakueri ampe kuajpejka ixu juchaari paísïrhu turhisï jimpo arhikata derechos lingüísticos, jimpoka k’uiripu indígena naninterku marhuatasïnka ts’ïmeeri wandakuechani éska jimanka jinteeka institucionicharhu, socioculturaliicharhu ka wantakua etsakutarakuecharhu. Miaparini imani ampe éskaksï kánekua jukaparhakueska mámaru jásï wantakuecha ts’anka ixu Méxiku jaka jimpokaksï ts’a yóni yóntki anapueska.